Valentina Libertsova

Taratammo karjalakse

Karjalakse paista himo,

Omal kielel tarattua,

Kunne konzu ajelimmo,

Midä voimmo ozuttua.

 

Pagizemmo karjalakse,

Sanelemmo uudizet,

Älgiä jiägiä veriän tuakse,

Kylän čomat neidizet!

 

Karjalakse pagizemmo,

Uuzii ruuttii ozutammo,

Toine tostu kuundelemmo,

Oman lemmen nostammo.

 

Karjalakse pajatammo,

Hinhetämmö – hol’otammo,

Vahnan tansin ozutammo,

Kezäilmal hengitämmö.

 

Omal kielel paista pidäs

Joga päiviä kodvaine,

Sit vai oza oigieh vedäs,

Gu joven puhtas virdaine.

 

Buaban opastandat

Päivy nouzou tuomen tagan.

Buabo kaččou: viego maguan?

Häi jo leivät päččih pani,

Muamo ammui niityl meni.

Tuatal eule kezälomua –

Meččyruavos täydyy hommua.

Lehmät ammui lypsetyt,

Paimoinkarjah työnetyt,

Vazat aidah ajetut,

Lambahazet juotetut

Kanan jäičat kerätyt,

Parniekkazet avatut.

Vaigu heinät suattolois

Kuni mua on kastielois.

Päivy tuomen ladvazeh -

Levitämmö terväzeh.

A sit kengät jalgah,

Evähäzet selgäh,

Haravazet olgupiäh –

Niityl heinii šiblomah.

Tuatto niitti ehtäl,

Muamo – huondeszor’kal.

Räkel kezäpäiväl

Suolgi – märräl kohtal –

Heiny tarväh kuivau,

Lekuttua vai haraval.

 

Buabo syötti čupukal,

Työndi meččydorogal.

Sanoi: ”Älgiä yöksykkiä,

Tiel sie muamua kirrukkua.

Mennes koivuu katkokkua,

Piendy vastua sivokkua.

Huogavundakse murginal

Käygiä must’oižikkoh rinnal.

Toinah löydyy rengiine

Da vie syvvä kobraine.

Muamua niityl kuunelkua,

Älgiä kesken riijelkiä:

Meččy täyzi rahvastu –

Kuuluu toiči toine tostu.

Riidelijöi tyttölöi,

Toraččubrihaččuloi

Moititah da tret’t’uijah,

Tanssih mennes hyllätäh,

Bes’odois ei vallita,

Suvaimah ei ruveta,

Pereheh ei oteta.

Gul’aiččijes huolitah,

Toiči grivat annetah”.

Kuni päččii kabrasti,

Baba eliä opasti.

 

Mačarvele

Puutui roindumuale kävvä–

Oli himo sinne ainos –

Valgie vetty järves juvva,

Syväin pestä mustoskaivos.

 

Olizin gu linduzennu –

Lendelizin joga kuudu,

Olizin gu kuudamannu –

Pastazin sie joga yödy.

Olizin gu luja tuuli –

Lepiköt kai kuadazin,

Olizin gu taivastuli –

Pahat vuvvet poltazin.

Avavuttas heinikközet,

Kujozet dai peldozet,

Ojat, sillat, lauttazet,

Joga rannas kylyzet.

 

Olis panna kundoh taloit,

Tuatan käzil salvetut,

Nostua muaman kodinerot,

Nevvot, lapsil annetut.

Etbo kiänä iäre aigua –

Mugai kestät, kannat velgua.

 

Puutui kävvä roindumuale –

Died’oin, buaban kalmoin piäle,

Panna sinne obrazaine –

Vardoikkah muan Jumalaine...

Omii hierulazii nähtä,

Kylläl karjalakse paista.

 

Eläzimmö kaikin hierus –

Liygilästy ližävynnys.

Oli hyvä mieli nähtä:

Nuoret paginas ei juosta.

Mielihyväl kuunellah,

Vaigu paista varatah.

 

Söimmö liendy omis kalois,

Pajattajii kuundelimmo.

Lentoil hoiskien koivun varvois

Stroičanpäiviä mustelimmo.

 

Toinah Jumal ozan andau

Myöstin mennä tulien vuon.

Anna syväin ilmua kandau,

Kudai vaigu mielis on.

назад