О работе X Съезда карелов Республики Карелия (20-21 сентября 2024 г.)
Автор: Романова Татьяна Ивановна
20-21 päivinny syvyskuudu Petroskois oli pietty X Karjalan tazavallan karjalazien kerähmö. Kerähmöl oldih tuldu Tverin da Leningruadan aluen ezittäjät. Kaikiedah täh kerävyi läs 200 hengie. Karjalan piirilöispäi oldih tuldu 66 deleguattua, kuduat yhtes toizis paikois tulluzienke karjalazienke paistih karjalazien elaijas nygyzes da tulienaijas, karjalazen perehen perindölöis da merkičykses, muamankielen kehitykses da käyttämizes nygyaijan tovelližukses.
Kerähmön aigua kai paginat piettih kolmel sekciel:
1. Karjalazien perindöllizet eländykohtat: nygy- da tuliiaigu;
2. Nygyaigaine karjalaine pereh;
3. Kieli da kul’tuuru.
Anuksen kanzallizen kirjaston ruadai Tatjana Romanova oli deleguatoin joukos Anuksenlinnaspäi. Yhtes toizienke Kieli da kul’tuuru – sekciel häi pagizi karjalan kielen da kul’tuuran kehitykses. Tatjana saneli muamankielen opastundas Anuksen piiris, Anuksen kanzallizen kirjaston ruandas karjalan kielen da literatuuran hyväkse da anuksilazien aktivistoin da karjalazien perindölöin suvaiččijoin suures ruavos meijän kul’tuuran kehittämizeh.
Paiči sidä sekciel paistih karjalankielizien lehtilöin, TV-ohjelmien da uudizien kehitändäs, kniigoin piästämizes ilmoih muamankielel, karjalan kielen opastumizes kursiloil vahnembih näh, paikannimilöin viäräs kirjuttamizes da hairahtuksis virallizis luvettelulois da m.i. Joga sekciel oli kehoitettu kyzymysty Karjalan tazavallan karjalazien X kerähmön rezol’utsieh.
Kerähmön toizennu päivänny oli ilmoitettu uuzi rezol’utsii. Sih oli kirjutettu enämbi 30 yhteiskunnalistu tilua.
Myös joga piirispäi oli vallittu ezittäjiä Karjalan tazavallan karjalazien X kerähmön nevvostoh. Anuksespäi oli vallittu Anuksen kanzallizen muzein johtai Irina Romanova, Anuksen kanzallizen kirjaston ruadai Tatjana Romanova.
Kerähmön nevvoston johtajannu oli vallittu meijän omamualaine aktivistu da karjalazen kul’tuuran kehittäi Inga Nikolajevna Gurilova. Häi nelli vuottu ruadoi IX Kerähmön nevvostokunnas. Kerähmö meni da algoi myös suuri ruado karjalazien perindölöin, kul’tuuran, kielen da literatuuran kehittämizekse joga Karjalan tazavallan piirilöis. Pidäy sanuo, gu Anuksen piiris äijän azutah karjalan kielen kehittämizekse. Kai tämä suuri ruado eläy muamankielen da karjalazien perindölöin suvaiččijoin da säilyttäjien himol da väil. Pidäs, gu täh ruadoh yhtyttäs nuoret rahvas. Nuorizos häi rippuu meijän tuliiaigu.
